Hamutuk Homan Knanoik

Dolar hakmatek iha rai nurak Hanoin nabilan iha kakutak Tesi dalan ho mehi furak Sulan ba bote sai nain mesak 'Simsalabim' sai bubu matak Is hakat ain hahu nakaras Ho klamar duni mehi loron manas Hobur belit hanesan kaka'as Husi laletek sobak maka'as Ho matan fekit foti la as Oin solok faluk naksalak Bosu dukur nakoron to'o haklenak Maske rai ne'e nafatin hakdasak Liman badinas haluha hadi'ak Nune'e, haburas mehi duni Lalatak Dili, 20.02.17 Djoe Lari Mata

Husi rai nebe maioria nakonu ho fatuk ahu-ruin, ohin ema hanaran Baucau ka malae sira hanaran 'Vila Salazar', husi oan mane mesak ida eis soldadu tempu Portuguse, eis hela fatin iha asrama Taibesi, nebe dedika an tomak sai kondutor (kamineta, inumok, vaskolante, trator to'o karihho) ba kuaze nia moris tomak iha moris misaun nian. Liafuan 'misaun' sai ona nudar nia iis moris, iha hahalok nomos fiar. Lahatene, tragedia sa'ida mak mosu, karik mesak monu husi kalohan ka milagre. Nune'e, nia hetan feto ida. Feto husi rai nebe nahe ho fatuk "afa-kai" iha rai Saga-dete neba. Feto ida nebe haraik an laran maus, lagosta koalia barak no iha klamar sai lideransa. Ikus sira sasin ran iha domin hodi sai ami inan aman. Hafoin hakur liu ondas bo'ot naksalak barak iha uma laran, situasaun politika nebe lafasil, laloran naha ekonomiku nebe todan, sira fahe presente murak ba sira familia no ba sira an mos. Liu husi hahoris oan mane ida nebe ha'u bolu maun ...