Hamutuk Homan Knanoik

Istoria Badak !!! _________________________________ "Ha'u Rain, Ha'u Sei Tane." ********************** Hafoin tinan lubuk ha'u hakat ain husik hela O lolon. Husi rai ida ne'bé ema hotu hatene nakonu ahu ruin, infeita isin ho matak husi ai huun kulu ho nuu no hori uluk tempu Kolonialista, malae sira hanaran : "Villa Salazar" ka bee matan mosu no sulin iha fat-fatin no hatutan iha tempu okupasaun, bapa sira hanaran O : "KOTA BERKARANG" née. Ohin ha'u fila uma. Maske uluk ha'u hadook a'an lao ba rai seluk. Tamba moris mak haruka ha'u tenke husik O, la iha liafuan SAYONARA ka goodbye ne'ebé sai husi ibun antes hakat ain atu husik hela O iha tempu neba, tamba ha'u hatene "O SEI NAFATIN HORIK IHA HA'U FUAN no LORON IKUS HA'U SEI FILA BA O".  Maibe, ohin ha'u fila hikas ba rai ne'ebé ha'u moris fatin. Ohin loron O nia oin muda a'an sai oin seluk los la hanesan ona uluk. Ha'u sei...

Loron la'o halo'ot ba kalan Fera liman hisik kosar Lian halerik falun nonok laran Nafatin hakat ain maske susar Loron la'o la sente kolen Kosar turuk maran iha lolon Tan hakarak tuni ita bikan Ba loron aas bikan naton La sente oras dulas lais Duni mehi hodi hulan naha Karik "O" neon lahoman ho tanis Katak iha ne'e, O ami haluha Laran ne'e moras Se ohin ami liman mamuk La buat furak ami hasa'e ba aas Ho buat laek iha orasaun hato'o hamaluk Bidau, 18.04.17 Djoe Lari Mata

Fatuk ahu-ruin se hirusmatan ho firme Kulu, nuu no hudi hase hakmatek iha laletek Husi kraik, hare, fehuk no talas nahe namatak Iha nia, ami hatutan moris husi otas ba otas Ba Ahu-ruin lolon, ami kesi ami mehi Fatuk ahu-ruin sai ami iis la'o dalan  Sulin ida ho ran hodi hadau moris Hasoru laloran moris be nafatin si'ak Husi nanis kedas ida ho ami knananuk "Mutu-rabu" Hatudu iha moris sai ami lalatak Maibe, husi fuan klean neba, helik mos ami "Mutu-rau" Maske mosu ho lian no oin lamamar O ami rain, ami ran fakar fatin Husi O ami iha no ba O ami sei tane Ami promete,  Ho ami kbi'it rasik sei hamorin O naran Hatudu ba mundu, O la'os ahu-ruin le'et Baucau, 03.06.17 Djoe Lari Mata