Hamutuk Homan Knanoik

"Knananuk moruk." Alarma fanun Lakon husi kakutak liafuan dukur, malirin ka kolen Hakat sai nakukun, fila nakukun falun rai Duni lalatak husi nakukun laran Nu'udar makina folin laek Akh... ne'e ha'u bikan, tutur nonok ba liman leten  Fuan bo'ot, loke liman tane lian kro'at Maske fuan sakat, dodok, tolan lia tarak Ibun sai fatuk, nonok, maske los Se lian, bikan taka fila, biban troka liman Se sala, ahi inforno sei lekar matan laran Hamaluk knananuk barulho makina lian Fó biban sadere ha'u halerik, hakdasak Laran kmaus hodi kuda kanek iha kanek leten Sasin moris, sulin tuir oras nakdulas Hodi sai la'orai tane kabun rai badin Nafatin foti oin, roman sei dook Hulan mehi iha babota biar iis namlaek Koko fera fatuk moris ho kosar sulin Hanesan ai-horis iha rai fuik maran Nafatin lekar oin hamnasa, subar moruk tomak Huu anin kmaus hatudu buat hotu furak Tan di'ak, karik tonka ho ain rasik Dungannon, 02.12.18 Djoe Lari ...

"Hakmatek ." Bainhira abu-abu dasa rai Hahu molok manu sira hader to'o fila knu'uk Lakon ona didin loro-matan sa'e no nakaras Uma sira tuur tuituir malu, hakru'uk Falun àan anin malirin ho oin muron  Matan foti labiban hodi fihir kalohan Husi luron, ha'u nafatin baku ain Sidade falun ibun metin, mamuk hakfuik furak Manu fuik sira sasin mehi sedu hodi hakmatek iha nakoron Husik hela mak lampu sidade ho matan malahuk Fihir tuituir ha'u lolon to'o lakon husi nia hamrik Hamaluk lalatak, ami la'o liman ida ain ida Dala ruma ha'u hakat iha oin Dala ruma mos ha'u mosu husi kotuk Hamutuk, laiha sasin lia, laselok malu Nonok, sulin ho fuan hakmatek  Ami hakat, foti oin sikat nakdedar Husi fatin ida ba seluk hodi hatutan iis Dungannon, 01.12.18 Djoe Lari Mata

      "Knananuk Mamuk." Husik ha'u hakilar  Ho nanal be ba'ar Ha'u hatene kalohan nonok Hakmatek Lahatene sá mak ha'u hananu Husik... Husik ba ha'u hakilar Hau lakohi tan hateke loron aban Loron ohin de'it nega ona ha'u áan Karik uluk ami lahoman otas tuan Buat hotu mosu nu'udar milagre Hanesan ibun be haluha sá mak liafuan Husik... Husik ba ha'u hakilar Husik. Husik ba! Karik sira merese To'o ha'u iis mos sira lalin ho kma'an Ba ó dadolin, ha'u subar ha'u hakmatek Basá lalatak mos la'os ona ha'u nian Falun knanoik ne'e sasin ha'u liberdade Dungannon, 26.11.18 Djoe Lari Mata

"Hader!" Bainhira ukun áan Iha bandeira, iha hino nasional Iha soberania Iha ai-rin Iha lutu Ho lei rebo-rebo rasik Bainhira ukun áan Ida rua de'it mak bosu Ida rua de'it mak merese Ida rua de'it mak halo buat hotu Ida rua de'it mak sai na'in Bainhira ukun áan Lamas mehi iha de'it anin laran Nafatin sai atan iha rain rasik Nafatin sai la'orai iha knua rasik Kaer rasik kuda talin so iha de'it materia eskola Nune'e, sunu ó lilin Fanun neon Harahun ego Atu kabun la sama kakutak Hadau mehi ba klamar barak Atu ó aban bainrua... Ó oan sira la hela ho istoria mamuk Loro matan iha ona uma kakuluk Tan ne'e, hader! La lohi áan hodi saran neon rasik Craigavon, 24.11.18 Djoe Lari Mata

"Mau Fehuk Los." Momós fakar ba matan laran rasik Anin bo'ot sobu, loron manas mos naruk Uma baraka ai-tali nafatin horut moruk Fatin ne'e, mahon ne'e ó nian la'os seluk Etu bikan laran ó fakar lafolin loron baluk Hodi hanaruk lelir nakukun husi ó lalatak Ukun áan nia folin sai mamuk malahuk Kaku'uk kakutak haluha áan kikit ran rasik Laek ona mahon, lae mos ida satan netik Oan rai oan nafatin falun áan ho laran tauk Saseluk aban so horon anin dodok iha sira knu'uk Craigavon, 19.11.18 Djoe Lari Mata

"Novembro Nakukun!!!" Fulan hirak liuba, loron barak liuba Hatenu fat-fatin, mosu ho laran osan mean Lian ida hananu ida, atu fase ami oin Hot-hotu tane sira nu'udar liurai lalehan Kesi laran metin katak mehi bele kaer ho liman Lia sasin, biti mos homan hodi dada kabas mean Etu suru ba bikan, laran fiar kesi ba liman Knananuk furak hotu nakfilak kamutis Mehi furak lolos mahoween iha loro-manas Nakfilak áan nu'udar asu oan nurak oin-metan Ne'ebé ho hanoin, "mate bele sosa kotu." Laliu batar silu dala ida, iha nia knu'uk Hamlaha be kesi babota, saran nia husar talin Ho kaben naksulin atu kuda metin fukun Ohin, ho iis bo'ot han duni nia oan rasik Belfast, 18.11.18 Djoe Lari Mata

"Tuba ho matan rasik." Rai malirin sona ha'u kulit borus to'o ruin Sadere ba fiar, hananu knananuk tuan "Ad Quid veniste" lori tuir ain fatin Ho oin hamnasa hatutan liki ain ba oin Hakruk ba rai, hili hikas fulun be monu husi liras Sasin neineik hodi homan loro matan Biar kalohan nafatin hatudu oin buis Iha neba huu mos anin kmaus bali kanek Laiha ona sasin liman hodi mehi àas Hakmumuk nonok sà mak suru bikan laran Lekar ba kalohan metan katak nia sei horik laliu silu batar dala ida Basá midar lamosu husi mehi kalan NB : liafuan "ad quid veniste?" mai husi lian Latina ne'ebé dehan katak : "ha'u mai atu halo sa'ida?" Dungannon, 16.11.18 Djoe Lari Mata

"Basa rentós folin laek." Moris ne'ebé lekar nabilan mesak nakfunan Kari neon malahuk hodi falun fuan naroman La hateke ba kotuk, koko hakat liu loron aban Sasin moris lolos loron ikus, lekar furak ba matan Ain ne'e hatutan hakat, ba dalan tarak rai naruk Tisi ba kakutak "ha'u mos bele hanesan seluk" Hokonu ho homan liman mesak soin mamuk Duni hamro'ok pedasuk haluha otas tutan hakru'uk Ohin, sisi folin ba áan ho otas be la matak Iis namkurut mehi tuan namlele hikas iha kakutak La biban kuda folin, basa rentós tutur liman hamulak Loron aban nian be mehi, liu dadaun nu'udar lalatak Craigavon, 03.11.18 Djoe Lari Mata

Se karik aban ha'u laek ona Fatin hakotu ona ha'u ho imi Keta laran susar. Keta ! Keta hasulin mataween. Keta ! Keta lohi áan, hodi tinan seluk tebe dahur ba ha'u nia lakon. Keta ! Tan ha'u lakohi loron finadu nu'udar mehi furak kalan nian No molok nakaras, furak tomak, su'ar lakon, iis tolan ba memoria Maibe... Hamnasa ba. Ba tempu di'ak ita hamnasa hamutuk Aten boot ba. Ba biban áat ita sela hodi kahe dikur ba malu Hanoin ba. Ba buat furak be ita fahe ona Tan moris nu'udar biban loron sorin Maske ha'u lalatak la nabilan nu'udar loro-matan Iha ne'e, iha fatin mamuk ne'e Ha'u nafatin moris iha imi hanoin Biar ha'u ilas lakon husi imi matan Maibe ha'u lalatak nafatin la'o ho imi Basá ha'u klamar sei lamate bainhira imi sei iha (Refleksaun ba loron finadu) Dungannon, 01.11.18 Djoe Lari Mata

1. "Hakat ba mehi ." Kuda liafuan Sikat ida rua Rai ida, sabir seluk Pinta klamar namlele Ba kor moris matan laran Keta hakat dook, keta semo áas Keta. Besik de'it badak de'it Atu bele belit kakorok kuda iha fuan Habiban buras iha neon sai bukae Husi liman fo'er kabun hamlaha Be kabala hela lian fiar iha kba'as Keta tisi ba sofa leten Keta helik ba neon dukur. Keta. Tan laran metin hahu naksulin ba abut sanak Nune'e loke liman ba, kaer hodi sani folin Dungannon, 05.08.18 Djoe Lari Mata 2. "Na'in ba hakat rasik." Hakat.... La'o haborus loro matan si'ak Fera nakukun nia fukun Kahe kosar fase taridu tomak Lekar tuir mehi be kuda metin Hananu ho fulan haklalak ho fitun Tisi ba kohe iis pedasuk mak hetan Ta'uk monu? Hotu sei la ses dalan ne'e. Hakat ba,.... to'o baibhira nakaras homan hikas nia roman kmaus hakmatek Basá,.... só aten brani mak sai nain ba moris ne'e Dungannon, 26.07.1...