"Kor hanesan, maibe to'os lahanesan."

Lor-loron ha'u ba halo toos besik bee matan ninin, fila rai, kuda aihoris no hadi'a lutu. Husi matenek naton nebe ha'u iha, ha'u uja arame hodi kesi lutu no halo lutu nebe aas. Iha hanoin, "karik bele dura to'o tempu silu batar dala rua ka tolu mak foin troka hikas no susar ba animal fuik sira atu passa ferias iha laran."

Toos nebe iha, animal fuik sira hahu latama arbiru, aihoris mos moris ho buras no matak malirin iha ambiente nebe hakmatek. Sira bidu haklalak bainhira anin hase. Halo ha'u laran sai haksolok, tamba hare ba toos sor-sorin, visinho sira nian, animal ain hat sira halo festa tiha iha laran hodi halo tuir tiha sira nia hakarak, estraga aihoris tomak  nebe ho kosar been sira kuda ona, maibe ha'u nian, lae.

Hare ba ha'u nia toos matak tan de'it, nune'e, iha loron ida lekirauk inan ida mai kose-kose ona hodi hasai lian : "bro... ne'e, ha'u ohin hetan uvas baluk husi toos sorin, foti ba karik bele kura o laran hamrok."

Ha'u mos lolo liman hodi simu uvas fuan hat lima ida husi nia. Husi nia oin, hatudu lolos de'it naha boot ida iha nia kakutak atu fakar sai, nune'e, hanesan sientista ida, nia sadere ba lutu, hateke ba kalohan, liman sanak rua koi hela ulun hodi taka loke matan, ho oin seriu hanesan ema hanoin barak.

Ha'u husu obrigado no liman lori uvas fuan hodi ruun dadaun. Teki-teki, nia hatutan koalia, "ehh... ha'u hare animal barak ohin loron muda ona ba fatin seluk ka karik pesti oho hotu ona sira nune'e ha'u lahasoru ona sira loron naruk ne'e. Nusa o tenke halo lutu aas no kesi tan ho arame? Se mak atu sobu o nia toos? Nusa o halo kole aan hodi halo buat nebe lafolin?"

Nia hanoin, karik ha'u matan delek ka dukur hela. Ka karik aifuan be ha'u han dadaun ne'e lanu hela ha'u. Maibe iha ha'u laran, nia kala beik sala ona ou hasoru sala ema. Nune'e, ho hakraik aan ha'u hatan ba nia : "miga, uvas nebe o fo ne'e midar, maibe o nia liafuan be o koalian ne'e midar liu kedas."

Ho oin lafiar, halo reintos namkurut, nia hakiduk ba kotuk, hodi husu fila, "maksud?!?!"

"Ohh... ha'u nia maksud ne'e atu dehan de'it ba o katak : 'karik lutu ne'e lafolin ba o maibe folin tebes ba ha'u. O keta hanoin tuir fali sira, kolega visinho sira toos sorin mak monu ba o nia gaiola, tolan tomak o nia lia midar. Maibe, ha'u LAE!' O hatene ka lae, hah !?!? Aifuan midar nebe o fo, maske barak, maibe sei lagarantia ha'u no familia nia moris wainhira CAC (la'os KAK = kawan amankan kawan) horon no kaer ha'u, ikus sulan ha'u iha hotel Becora. Di'ak liu ha'u han ha'u nia kosar been maske oituan, maibe sente hakmatek duke han matak maibe laran taridu. O rona ka lae!?!?!"

Hafoin rona tiha ha'u nia homilia, hanesan rai-lakan fekit kona nia, nia lahasai tan lian, isin sai namlaek, fila kotuk hakruk no la'o ba dadaun ho oin sin nakonu ho laran sa'e tan lasatisfas no susesu rega ha'u.

Bidau, 01.06.17

Djoe Lari Mata