"Do'ok sai besik, Besik sai do'ok."

Ha'u ema foho, moris iha foho no hahalokmos hanesan ema foho. Iha tempu ha'u sei SD klase 0, ha'u la hanoin kona liu dalan oinsa ema kontaktu malu wainhira do'ok husi malu. Tamba tempu hotu be furak liu ba ha'u mak so uja ba halimar. Hatene mak halimar no halimar no tempu duni atu halimar. Hafoin tama klase 4 SD mak foin hatene kois wainhira ema kontaktu malu atu fahe info husi ema ida ba seluk liu husi hakerek surat. No iha tempu neba, se la sala maluk sira (bapa oan) uja "sahabat Pena" hodi kontaktu malu husi rai ida ba rai seluk no ba asuntu importante ema boot sira uja telegrama ne'ebe sente sei lais liu duke surat. Hafoin ha'u sae ba klase 6 SD, hahu eskola hamutuk ho bapa oan sira, ha'u iha oportunidade hodi aprende netik buat ruma husi sira. Ha'u sei hanoin wainhira ami tuir les bahasa Indonesia, sira hanorin sira nia lian mai ami, konta istoria labarik nian oioin mai ami, no molok fila ba uma ami sei halimar hamutuk iha salaun eskola nian. Iha tempu neba sira hanorin ami halo aviaun, roo, gafainhotu ho surat tahan to'o halimar duni malu nebe ho naran Benten. Ha'u kontente tebes hodi aprende halimar sira ne'e no ida nebe ha'u sei hanoin kona mak : ami halo telfone husi ahi-kose nia fatin, kesi kabas iha klaran no dada do'ok malu atu koalia, hodi hasara tuir sira nia aman wainhira koalia iha radio rakal/HT. Iha tempu neba ha'u seidauk hatene saida mak telfone Nokia Lumia, Samsung Galaxy sa tan iPhone, maibe so hatene mak radio rakal ka HT, ne'ebe ita hare ema ida sei koalia mesak, tantu atu koalia ho hirus ka hamnasa nia nafatin mesak koalia ho sasan née. No ba ami sei mosu hanoin oioin tamba iha tempu neba ema hotu sei tauk wainhira hare tentara koalia iha HT, ne'ebe iha sinal katak asidente ruma kala mosu tan ona ka ema boot ruma atu mai visita. Se asidente ruma, tentara sira seig revista ema hotu, tama uma sai uma no wainhira lao ba nebe deit tenke iha "Surat Jalan", se ema boot mak atu mai, ema hotu iha suku laran sei simu avisu hodi dada bandeira mean mutin iha uma oin, foer hotu iha uma sorin, oin too baleta tenke mos. Ho situasaun rua née mak halo ema hotu tauk, tamba se lahalo tuir tentara sira sei la tauk atu baku ema nebe la kumpri nee. Konaba HT, sasan ida née Karik so ema servisu iha edefisiu boot iha vila, ema boot ho ninia familia, komandante militar ou polisia ho ninia elementus sira iha postu no liman ain Timor oan balun deit mak kaer hodi uja ba kontaktu malu atu fahe informasaun. Tempu mos nafatin lao, ha'u remata SD, SMP, SMA no hakarak hatutan eskola iha Jawa, tan wainhira sei ki'ik mestre/a sira sempre koalia mai ami katak tenke sai matenek mak ema ida sei hetan ninia futuru diak, liafuan née motiva tebes ha'u, nunée hafoin simu tiha NEM ho STTB ha'u tun kedas mai Dili hodi buka dalan karik iha oportunidade bele hatutan eskola iha rai liur. Hafoin liu tinan rua moris iha Dili, ha'u hetan dirasaun tiun ida nian iha Jawa, Tiu ne'e nia naran Mariano ka bolu Amari, ha'u mos haruka surat ba nia. Nia fo resposta hodi hakerek dirasaun kompletu no haruka telfone deit ba nomor nebe nia hakerek ona iha surat nee se hakarak informasaun ruma. Atu hatene informasaun ho diak, ha'u ba wartel (warung telpon) nebe hahu mosu ona iha tinan 1997, ha'u koko kontaktu hodi husu tuir. Tamba foin mak atu lao ba rai do'ok, buat hotu sei sente susar se ita lahatene lolos. Maibe ha'u nia laran sei husu malu hela, tamba ha'u tenke ba telfone maske ha'u rasik foin mak atu uja no lahatene sei koalia los saida. Ne'emos hanesan naha nebe ha'u tenke hulan. Wainhira ha'u hanoin atu ba telfone, ha'u sente laran tauk kahur haksolok no hanoin funan-funan los. Sentimentu nee mak ha'u iha wainhira hakat ain tuir dalan "Pasar Sengol" ba wartel nebe iha Akadiru Huun besik kantor desa nia sorin iha lokraik ida, tamba iha fatin neba mak iha wartel. Maibe, Saida mak ha'u sente iha momentu neba ? Fofoun, hakat ba wartel laran, fo nomor telfone no husu minina Javanesa be hein wartel née atu liga ba Jawa, hafoin telfone tama nia lolo telfone ba ha'u atu hatan. Derepente deit ha'u sente tauk, laran nakdedar no lahatene atu koalia los saida wainhira kaer ona telfone kain hodi see ba tilun, maske ha'u hatene hela katak molok tama ba wartel, ha'u iha ona hanoin oioin atu husu, liu-liu atu konaba : ha'u nia hakarak atu ba Jawa hodi eskola iha neba. Maibe derepente deit hanoin semo lakon hotu kedas, lahatene ba nebe, hanesan kalohan iha a'as neba hodi lamosu kedas fitun ida rua iha laran wainhira fulan naroman. "Hallou.... " ha'u rona lian née maibe hanesan istatua, ha'u la hatan, reintos hahu kosar maske sala laran full ac no hafoin liafuan Hallou.... née ba dala tolu, hanesan hakfodak, laiha bomdia boatarde ha'u hatan kedas. No a'at liutan mak ha'u hanoin katak ida be koalia née ha'u nia tiun, nune'e ha'u uja kedas lian Makasa'e hodi hatan. "Ibobu.... Ibobu...., ere Ani do he'ere. Ani.... Ani Atoi, ani karaka Jawa isi la'a nana, mara do we isikola nana. Be'u di tonai ? Ani haisa'i isikola." Maibe husi telfone laran ha'u rona : "Née ha'u koalia ho se ?" Tan née, maske ha'u tetúm seidauk mos ho diak maibe obriga a'an hatan ba telfone laran. Ha'u konta hikas ha'u nee se, se nia oan, iha Dili hela iha nebe, hela ho se, husi distritu nebe, hakarak atu ba eskola iha jawa no koalia tan buat barak. Maibe, husi telfone laran ha'u larona nia hatan mai ha'u. No hafoin ami nonok tiha besik minutu ida, nia hatan mai dehan : "Entaun maun hein lai oituan." Ha'u nafatin taka telfone ba tilun hodi hein, la kleur lian husi telfone laran mos hase ha'u : "Hallou... née Amari mak koalia..." Iha tempu née kedas ha'u koalia hikas ho ha'u nia lian materna hodi husu oinsa bele to'o iha neba, uja saida mak ba, semak sei simu ha'u se to'o iha neba no ikus husu se mak ohin koalia uluk ho ha'u nee. Hafoin nia esplika hotu ha'u foin hatene katak ohin be koalia uluk ho ha'u née tiun nia rian ho naran Alitu. Koalia hotu tiha, selu wartel no fila ba uma. Iha dalan klaran ha'u hanoin fali no sente moe ho kontente kahur malu dala ida ba hahalok ohin née, maibe halo ha'u mos to'o hanoin lahetan, oinsa ho deit buat a'at née bele halo ha'u hanesan tur hamutuk tiha ho tiun hodi dada lia ba malu, maske ha'u lahatene Jawa iha nebe Timor iha nebe. Maibe ho deit sasan née ami bele habesik malu maske hela iha fatin do'ok. Nune'e ha'u hanoin sasan née halo ita "DO'OK maibe halo BESIK TEBES." Besik semana ida iha tasi laran ho roo Dobon Solo ikus ha'u sama ain duni iha portu Tanjung Priuk. Alitu mos hein hela iha neba, nia simu ha'u no ami ba kedas uma. Aaaaah... Iha neba mak ha'u foin toman uja telfone uma nian. "Toi, orsida o sai ba halo tugas ka lae ?" "Lae, Tiu." "Entaun o ho ha'u orsida ba Atrium lai, par hola pager ida ba o nune'e fasil kontaktu wainhira o ba halo tugas iha liur." "Diak, Tiu." Ha'u hanesan grasa bo'ot husi Maromak nune'e to'o ha'u nia tiun mos hanoin hodi sosa sasan née mai ha'u. Hafoin tinan ida resin hela no eskola iha neba, molok akontesementu Trisakti iha tinan 1998, ha'u mos kaer ona Pager ida hodi fahe no simu info husi tiun no kolegas sira maske ho deit SMS. Iha tempu neba telfone ka handphone (HP) oioin hahu mosu, hanesan Motorola, Erikson, Siemens no seluktan nebe sei uja antena. Ha'u eskola lahotu tamba situasaun politika hahu manas, nune'e ha'u fila hikas mai Timor. Hanesan liafuan ne'ebe Che Guevera hateten, dehan : "Laiha buat ida mak ETERNO(abadi) iha mundu née, so MUDANSA." Nune'e, karik iha tinan 2002 ka 2003, Iha Timor, telfone tuan sira be temi iha leten hahu menus, talfone antena laiha ho kamera hahu mosu hodi habelar iha Timor laran. No ba tinan tinan tuir mai iha née, ha'u hare ema barak hahu kaer no hola telfone hanesan hola kanko. Hodi hamosu ha'u nia laran moras. Tamba uluk tempu ha'u sei ki'ik, atu hare hetan no kaer deit telfone ida mos susar par mate maibe ohin loron se deit bele iha telfone, to'o fatin atu rai telfone mak laiha tamba ema ida-idak bele kaer telfone ida rua tolu ka hat dala ida tuir nia gostu. Laran née sai moras liu tan wainhira iha tinan 2004, Mark Zuckerberg hamosu rede sosiais Facebook be nia laloran mos baku to'o iha Timor. Ne'ebe hanesan anin fresku hodi halo ema tomak bele utiliza HP kamera tuir sira nia gostu. Tamba ema hotu bele asesu ho gratuito, nune'e husi labarik to'o ferik Katuas, rame-rame uja FB no iha fatin nebe deit. La iha ona lutu hodi teri netik katak se no se deit mak bele uja ka asesu. No to'o ohin loron, imi hatene saida mak mosu ? Karik ha'u bele dehan : "Ema hotu be hatete ona hakerek no lee, ba nebe deit, halo saida deit, telfone tenke iha bolsu ka liman no sai ona hanesan roupa nebe tenke uja no moe se sasan sira née laiha. No ba fiar nain sira, karik sira badinas liu visita FB hodi update status ho foto nebe sira hasai ona duke prepara a'an ba visita Maromak iha igreja wainhira loron Domingu. Husi teknologia (HP, Internet no FB) halo ema ida-idak hanoin mak nia a'an ka sai individualismo, katak : maske atu ba nebe, tur iha nebe, tur ka lao ho se, hala'o ka tuir seremonia saida deit, ida-idak nia matan no liman fuan iha hela deit telfone leten no a'at liutan mak iha klosan sira balun namora hela mos ida-idak preokupa liu nia a'an duke doben be iha hela nia sorin. Nune'e, se liga fali ba ha'u nia tempu uluk karik dehan : MASKE BESIK maibe SENTE DO'OK TEBES." Iha moris lor-loron, tan deit atu UPDATE status iha Facebook, ema barak hahu fila espelu kotuk mai oin, hodi lekar sai sasan uma laran mai iha estrada klaran. Hahu Soe sai sentimentu, hanesan : terus, susar, halerik, hamnasa, fuan tohik to'o odiu malu mos tau iha FB. No tan deit status, ema balun la moe atu kolu molik a'an iha FB, hanesan : ba pasiar, festa, han, hemu, tee, mii, haris to'o hatais laran mos mosu iha status laran. Oras nafatin dulas, loron ba oin nafatin no tinan troka malu nafatin, maibe ho hahalok ema modernu sira née, laos halo ema sai matenek liutan lae, maibe halo ema nakonu ho apelido "TEN" ba sira nia karakter. Hanesan : - uluk badinas ohin baruk"TEN" - uluk koalia lia los ohin bosok"TEN" - uluk matenek ohin beik"TEN" - uluk amuku ohin nakar"TEN" No sei baraktan, se karik imi hatene no sente mesak bele aumenta rasik. Hahahhaha....., to'o halo ita ema lakon ona ita nia sensibilidade sosial ba malu ka sentidu halo KARIDADE ba malu wainhira ema baluk iha susar laran. Husi hahalok ego nebe makas no ejizencia ba UPDATE STATUS, halo belun sira kru TVTL mos nia servisu sai kma'an liu tan. Tamba ohin loron mosu jornalista amatir kintu kantu, tantu iha foho ka vila, rame-rame upload informasaun konaba : husi bebe foin moris to'o ferik katuas matebian, husi rai ikun to'o rai ulun, husi rai leten to'o lalehan ka inferno hodi hafoun sira nia status. Ha'u sei hanoin hetan wainhira asidente motor soke malu iha super merkadu ida nia oin iha lokraik ida, ha'u hare husi do'ok +/- 40metros, ema barak hobur lolos deit jornalista hadau malu fatin atu intervista artista top, maibe sira lakoko salva uluk vitima maibe rame-rame hare liu deit hodi hasai foto husi HP. Lahatene los saida mak sira sei halo ba foto sira née ? Update status ? Ka kontaktu vitima nia familia ? Ka kontaktu Ambulancia ou polisia ? Ka koleksi privadu ka atu halo saida ? Hah !?!?!? Ba ha'u, ha'u LAHATENE !!! Lahatene saida mak sira nia motivu hodi hasai foto. Ba ha'u, husi lalaok sira née, bele kura netik ha'u nia laran be moras née, hanesan ha'u temi iha leten, katak : maske tarde teknologia née mosu iha hau moris maibe ha'u kontente tamba lahetan apelido "TEN" no nafatin haburas sensibilidade sosial. Ha'u laos ema perfeitu maibe sekarik fo tempu ba ha'u atu loke ibun, karik ha'u sei hamenon : "teknologia ida sei sai diak ba ita se ita uja tuir nia dalan no la oho ita nia karakter rasik." Dili, 15.08.16. @Djoe Lari Mata