"TAMBA SA ?!?!"

"Heiii...! O hare no hanoin to'ok, Ohin loron husi ita sor-sorin, Husi vila laran iha foho hun to'o foho kakuluk, Hamriik uma mesak zigante, Nain husi kakutak haluha a'an Ho osan be sura la hotu, iha rai laran liur no karik iha planeta seluk. Nusa bele nune'e ??? Ida bosu rihun hamlaha, ida nee mak folin ukun a'an ??? Hakuak traidor no NEGA mat-matak O nian rasik ? Ha !?!?" "Ahhh ... Husik ba, karik ida ne'e mak destinu." "Tfuiiiii ! Ha'u la fiar destinu ! Destinu so ba ema be NEON KI'AK sira nebe tur tane liman ba ninia lalaok moris nebe nakukun nanis." "Ouuu nune'e, entaun tenki haka'as a'an hodi muda moris, katak buat hotu iha ita liman rasik no hamenus halerik ba buat nebe la merese atu halerik ??" "Tebes !!!" Maske ema tomak hatene, rai ne'e riku mina, kafé no ai kameli. Maibe ,,,.... Nusa lalaok ne'e sei nafatin haburas ? Badinas tebes aplika lei natureza, ki'ik nafatin ki'ik,hanehan nafatin maske la hanehan mos sira sei lahadau malu atu hatudu oin. Tamba sira la presija buat née, Justisa sosial mak mehi ba sira. Karik mehi née sai realidade ?!?! "Laiha garantidu !!!" Ohin,.. Iha ha'u uma, fatin hotu NA'IN IHA ONA, husi dapur, haris fatin, sala familia, sala visita, baranda so uma tatis deit mak husik hela hodi bou hamutuk ba sira be mau teju. Sala importante so ba sira be iha, bo'ot, kbi'it la koko no laorai sira. Sira be iha, fila liman halo masonik halo uma mesak naruk sa'e ba lalehan to'o bele kaer halimar tiha fulan wainhira kalan hamaluk. Falun ho interese nasional, kedok hamutuk ho kakutak oportunista, reboka ho klamar egoista sira halo ba sira nia a'an, maske iha neba, husi sira sor-sorin, husi sira matan okos, sira nia maluk, sira ran rasik, habai loron lakan, hadau netik kabun kahur mata wen nafatin hamulak tamba etu lato'o hodi halo bosu uma laran ba loron ida, maibe iha leten a'as neba, kosar la turuk, nahe a'an iha fatin nabilan, sira, sira lubuk ki'ik ida, ho hakmatek no reket nehan, tu'u kalis ba malu, han to'o arota didiak ho folin ne'ebe sira hetan karik so Maromak mak hatene katak sasan sira nee hetan tuir dalan los ka lae. Husi loron ba loron, hotu-hotu hakat hasoru moris siak nebe la mamar, kbi'it laek aumenta la sura duke ema iha nain, iha kintu kantu, husi fatin tomak no buat hotu tula ba dasi todan sorin deit. Simbolu justisa be hori nanis nia matan kesi ho lasu metan, ohin, ema be lubuk ki'ik nee, kore sai tiha ona lasu metan neba, nune'e justisa mos matan hateke no hatene hili tuir se mak bo'ot no se mak ki'ik, no dala wa'in lei piska deit matan ba bo'ot no nafatin sena todan ba kbi'it laek sira. Maske uluk, ema tomak, ki'ik no bo'ot, tula liman hamutuk to'o balun soe isin no ruin, atu ikus hakotu lalaok ne'e. Maibe saida mak ohin hatudu ??? Ha !?!? Ema hotu hatene, katak lalaok hanehan tenke hasoru ! No iha fatin hotu, husi mundu ida ne'e, katak, buat LOS to'o ikus sei MANAN. Maibe BAINHIRA los ??? Ha !?!? Dala ida tan, los sei manan se wainhira ita hotu hamutuk, haka'as a'an ho kbi'it tomak atu halo HASORU no sobu rahun hahalok a'at nee tomak husi fatin ne'ebe ki'ik liu, husi ita neon no klamar rasik, nune'e ita bele iha kakutak naroman hodi LUTA ba buat bo'ot. Hodi hasai ita husi nakukun nia hobur. No fiar ba, moris nafatin nakdulas no ita laos nune'e nafatin to'o mundu nia rohan. To'o mata wen maran kedas husi nia kadunan mos ema tur la liga Dili, 29.07.16. Djoe Lari Mata