"AMI RAIN"

Hafoin ita hotu hatene, ema tomak matan nakloke, mundu tomak nia emar doko ulun rekonhese O nia moris, O nia a'an, O nia mosu no O nia iha. Sira hotu ho ibun ida lian ida, ain ida hakat ida, hanesan isin ho klamar sai ida, nune'e hobur hodi hananu. Katak : O laos ona atan ka ema dadur husi rai ketan Republika Portuguesa nian, O laos ona provinsia ba daruanulu resin hitu husi Negara kesatuan Republik Indonesia, O laos ona rai ho status nasaun ne'ebe la iha governasaun rasik, Maibe,.. O nasaun ida ona, bandera ketak ona, O mak nasaun RDTL ka Republika Demokratika de Timor Leste nu'udar bebe oan foin moris ne'ebe sarani ho naran mesak ona. Ema hotu haksolok, tamba O hanesan ona bebe oan foin moris, ema tomak, visinho uma sor-sorin hanesan ema lao rai, husi ema ne'ebe konhese to'o ema ne'ebe oin fuik, hakbesik hodi lolo liman, hodi selebra loron moris. Balun kous tiha no hi'it a'as tiha ba lalehan hafoin lu'ut fali iha versu laran, balun mai kous no rein deit, balun kous hodi bidu tun bidu sa'e ho oin haksolok, balun kous no reket nehan hodi SELFIE, nune'e hodi halo dalan tama sai O uman kloot tebes, tamba ema sena malu hodi nadodon tama mai, to'o iha uma sor-sorin mosu hanesan kulat ho baraka oan bar-barak, ho hanoin faan netik dalan los lia los, justisa no direitu humanu, karik visitantes ka uma nain balun hamlaha ka neon hamro'ok hela hodi sosa netik sasan sira nee. Maibe ikus, saida mak sira hatudu ? Afinal tiatru saida mak sira toka haklalak iha luron hodi selebra O nia loron moris ne'e LA LIU interese ne'ebe falun hela ho oin midar, laran diak, halo belun ka maun alin koran, simpatia no buat diak rihun be sira hamosu nee nia okos. Katak midar hotu nebe sira oferese la ses husi interese ida-idak nian ne'ebe falun subar iha fuan nia fukun. To'o neim ema ida atu hatene netik maibe so Maromak no ema sira nee rasik mak hatene. Hodi halo O haluha a'an no iha duni tusan ne'ebe belit metin O klamar nebe tenke O selu wainhira hanoin kona ka loke hikas pagina O nia aniversariu. Nune'e, neneik ka lais tenke O selu duni ho saida mak O iha no saida mak sira matan fihir kona. Karik O lafiar, maibe ida ne'e mak ohin loron mosu duni. Laos deit sira, malae sira, maibe ha'u mos hanesan. Tan ha'u iha hanoin : "lalika obriga hili dalan ne'ebe laos ha'u hakarak, maske la furak iha ema nia matan, maibe ha'u fiar sei to'o iha neba." Hodi hulan ha'u isin hakat hakbesik. Nune'e ..... Rona deit katak ohin O nia naran morin lemo-lemo, O hamrik mesak ona, kaer kuda talin rasik ona no sela resik O nia kuda, halo ha'u no ha'u belun barak mak lais tebes troka faru nu'udar FOHO ba VILA oan, soe hela toos natar, ai-suak katana, luhu bote, nadodon sena malu tama vila hodi kail dollar no kan tebes atu sai vila oan nebe liman mihis ho mehi a'as tutur iha babota maske ami nia LOGAT,... Aiooo Nai,.... to'o ami haluha tiha atu soe hela iha Fatu Ahi tutun ka Marabia tutun ka Tibar nia tetuk hodi lori leku-leku tuir a'an hanesan kartaun identidade ba ami ida-idak nia a'an. Maibe nee mak ami nia eransa nebe tenke lori tuir a'an duni. Karik ho letratu hotu ne'ebe ohin loron taka iha kintu kantu, husi luron tomak hodi hatudu ba ema tomak atu hare to'o matebian sira mos ha'u la fiar sira la hare, no ba sira hanoin, karik sira bele muda tempu fila ba kotuk, sira, sira be karik hanoin no kakutak naton hanesan ha'u ne'e, sira sei arepende tebes no sei la mate a'an kaer kilat to'o sakrifika a'an tomak ba fakar ran soe isin lemo-lemo maibe ikus so letratu nune'e deit mak hatudu ba folin ukun a'an ida ne'e. Maibe karik ba sira, matebian sira be kakutak no hanoin a'as liu ne'e sei hanoin oin seluk, sira sei simu ho oin midar ho hamnasa ki'ik iha fuan laran, no hateten : letratu hirak ne'e normal no sempre mosu ba rai hotu ne'ebe nia istoria hanesan mos rai ida ne'e. No karik sei doko ulun hodi aseita liafuan murak husi matebian maluk husi rai sorin, ne'ebe dehan : "funu hasoru letratu ida ne'ebe halao husi maun alin rasik sei susar liu duke ema liur, tamba inus kain no kulit lahanesan." Nune'e,... Halo ita,.... Ita bele hare maibe hateke la hetan, Bele se tilun maibe lian larona no Bele hase maibe fuan nakoron todan. Tamba ita, ita be hare, se tilun no hase, sai hanesan ona ho robocop ka power ranger ka kura-kura ninja hodi laiha kbi'it maibe letratu sira ne'e mak sai tiha ona ba ita fatin hodi moris buras no habelar liu tan sira abut iha ita neon ikus hamosu ibun nakloke no kaben sulin ba sasan ita nian rasik nebe ohin troka liman ona. Husi ha'u no matebian sira nia hanoin ne'ebe la hanesan, ha'u koko atu hanoin hikas, no ha'u hatene katak hanoin sira nee bele los bele mos lae, no la koko atu dehan ida nebe mak los liu ka ida nebe mak atu los oituan deit mos lae, maibe kuitadu tebes tamba ha'u no so ha'u mak rona mesak ha'u lian, nune'e diak liu ha'u nonok deit iha neon nia lao, tamba : "LIA LOS susar tebes atu HATENE, tamba ema moris ida-idak ho ninia kondisaun neon fihir rasik." Maske ha'u simu no ha'u rasik labele halo buat ida, maibe kakutak ha'u sei iha, tan ne'e hasai lian husu, tantu ba ha'u klamar nune'e mos ba sira ne'ebe sai ona klamar tamba rai ne'e, Katak : Imi oan be kuda nain Nusa la sela kuda ? Maibe naha sela hatodan nafatin iha kba'as ? Sai nafatin atan ? Toos no natar Ita nian Maibe nia isin fo ema seluk mak bosu ? Imi fakar ran. Soe isin namkari lemorai Rate laek Atu ikus Imi rain ema mak sai nain ? Imi oan, Imi ran maluk, Maluk rai nain atu sama ain netik iha nia rain, atu reket nehan netik ba minutu balun iha fatin publiku ka horon netik iis anin tasi iha loron pedasuk mos ohin sai deit ona mehi no nakfilak a'an ona hanesan ema lao rai, nune'e tenke husu lisensa ba sira, hanesan asu sulan ikun tama kidun hakruuk rabat rai hodi harohan ba sira, hanesan asu sulan ikun tama kidun hakruuk rabat rai hodi harohan ba sira. Sira be LAO RAI osan barak nee. Kahur Sira be rai nain ida rua be osan sura labele nee. Ha'u fiar, no fiar tebes. Ohin,... Hahu ona husi tasi ninin Kleur ka lais foho lolon hotu Rai nain, karik hakarak atu hakmatek a'an ba oras pedasuk sei susar ona, karik so liu deit husi TVTL KA Timor Post, tamba osan kanku futun ida modo kalan nian sei la husik le'et hodi selu taxa atu hare rasik ho matan ba foho no tasi sira nee nia furak. Sa'ida mak nune'e !?!? Hah !?!? Se nune'e, Sa'ida maka signifika husi ukun a'an IDA ne'e ? Bandera mak ketak ka ? Nasaun mak ketak ka ? Presidente mak mesak ka ? PM mak mesak ka ? Lei mak ketak ka ? KA SAIDA ? HaH ?!?!?!!!! Ka ita ukun maibe ema mak nain ? Ka ..... Ukun a'an.... SA'IDA ?!?!???? Laos ami beik, Maibe .... Matenek Nain ho neon beik habeik ami Laos ami baruk atu hamriik, maibe,.. Matenek Nain hanehan ami badinas hodi nafatin sulan Dom Boaventura pedasuk atu ami nafatin haluha a'an atu hamriik Nune'e mak ami ohin loron Ohin loron ami mak nune'e Tamba sa sai tiha nune'e ?? Hah !?!? Karik ami mak "Rasa Aborigin Episode 2" ka ??? Ka SA'IDA ??? Heiiii ....!!! Matebian sira keta dukur nakoron demais ! Fila hasulin espiritu Nain rasik ba O rain iha O oan kakutak mamar sira kakutak, hodi fo hanoin naroman, fila sira liman hodi tane netik O emar sira ne'ebe liman, ibun, tilun no kbi'it laek nanis ne'e. Hader ona ba ! Tamba uluk imi gosta mehi, nee mak mehi hetan ona. Maibe imi hakarak mehi to'o deit dalan klaran ka ? Karik nune'e, ha'u hateten imi beik tebes hodi lakon moris ikus mehi kari hela deit iha dalan klaran. Ami nia tutan nanal sira. Laos dukur ka lahatene, maibe Dollar nisik hela kakorok nune'e lian la sai, ka dukur hakmatek hakoak sira nia kohe nune'e lalaok née nafatin buras no habelar. KA Ami nia Matebian sira, raihun mutin seidauk mosu nune'e sira sei dukur hodi LA TAU MATAN ba INJUSTISA SOAIAL be mosu malorek iha ami nia futar neon. No ohin atu haksolok netik deit iha fatin livre mos KARUN TEBES mai ami iha ami rain, ami rai ran fakar fatin. Dolok Oan, Dili, 10.08.16. @Djoe Lari Mata