"LA IHA SENTIDU !"

La hanesan loron bai-bain, ohin loron née ema barak mosu, la hatene mai husi nebe, karik husi rai seluk ka husi planeta seluk, maibe ho postura a'as noton, kulit morena, fuk mulatuk no kahur kribu, ha'u sente karik née mesak ita rasa Timor nian. Klaru, ke ema hotu mosu oi-oin deit. Sira kanta no haklalak, ibun loke taka hasai lian to'o nafurin katik sai, ho ritmu oi-oin iha ema hotu nia tilun, ho musika ne'ebe TUAN ona, maibe ba sira hananu hanesan ohin mak musika née hasai husi dapur gravasaun nian, hodi hase no hamaus ema hotu nia neon hanesan sira mak bee malirin wainhira ema hamro'ok iha loron manas laran, maibe, ikus kakorok nafatin maran atu kotu sal-sala. Ha'u nebe hanesan mos rona nain, ne'ebe hanesan mos tilun barak rona, mosu laran hakarak atu rona. Laos tan sira lian ne'ebe furak, laos tan liafuan kmanek nebe sira hananu no laos mos knananuk née kala kona los ponteiru ha'u nia fuan matan. Ha'u ladun hatene klaru. Maibe, atu hateten deit, katak tamba ton ne'ebe reboka sai a'as, naton no lotuk sa tan hananu ho logat ne'ebe balun hanesan mos ha'u nian, née mak taka ha'u nia matan fuan, hodi lohi ha'u neon, tan née halo ha'u hakmatek hori oras ba oras atu rona beibeik musika ne'e hanesan gravador ne'ebe nia butaun forward/ba oin a'at ona hodi nafatin toka lian ne'ebe mak hanesan maske la iha sentidu klaru mai ha'u. Husi lalaok née, ikus mai halo hau sai toman, hananu tuir sira no dala barak ha'u mos hananu ho ton oi-oin, ho lian nebe iha deit kakorok laran, ibun maten la book a'an maske hasai lian ne'ebe la ho liafuan ruma. Ha'u lahatene née tamba sa ? Musika sira ho modelu née, ohin loron mos badinas los sulin husi vila, tun ba munisipiu, hatutan ba postu-administrativu to'o fatin izoladu laran tomak rame-rame hase ema nia tilun hanesan mota ne'ebe sulin la kotu hodi ba hamaus ema hotu nia neon no karik sai ona hanesan hino nasional ida maske ho folin mamuk. Hare ba hahalok née, karik artista sira hakarak halibur netik hodi fahe lian menon ruma. Ka lia falsu deit ? Ou koko atu kari nafatin rai rahun ba rona nain sira nia matan, hodi kura netik fitar sira husi laran kanek ba fiar nian, ne'ebe ohin loron mihis ba nafatin ? Ka artista sira iha interese ruma ne'ebe hafalun hela ho lalaok née ? Hau rasik lahatene ! Ha'u lahatene. Karik, imi hatene ? Katak musika sira née mesak lixu ka artista mak mesak falsu ? Ka musika no artista sira mesak lixu ? Ka sira merese sai lixu iha ema kbi'it laek sira neon ? Husik ba !!! Sira mosu hodi halo rame netik festa. Maibe, ba ha'u rasik, Ha'u lahatene klaru.! Tamba, ha'u nia kakutak rasik ohin loron ema sosa kotu ona, no ha'u ibun hananu saida mak sira hanoin. Mais, oinsa ho ha'u neon ? Nebe ema hotu hatene katak so neon deit mak mos liu ? Ahhh... Haluha tiha deit ona ba. Hanesan ita hotu asisti. Tamba knananuk sira née so mosu no hananu sai rame iha loron balun deit ka tuir nia tempu, hanesan musika natal nian ne'ebe so hananu iha fulan desembro deit. No sira lian sei la rona hikas wainhira tempu née liu ona hanesan roupa kajamentu néebe rai hikas iha mala kidun hafoin festa remata. Knananuk sira née mosu ho interese ka hakarak ne'ebe klaru maske hananu ho ibun nebe falsu no laran makerek tebes. Maibe saida mak sei mosu hafoin nia tempu liu ona ? Sira !!! Artista sira sei halo saida ? Karik imi hatene ? Dala ida tan. Ha'u mos lahatene !! Karik, née nu'udar lisan ida hodi fase ema sira nebe ohin loron klamar mamuk ona née, hodi kuda fuan laran ba sira atu sai bibi atan ? Ne'e so artista sira rasik mak hatene !!! Ha'u mos lahatene. Maibe, se ha'u koko atu lohi a'an hodi hanoin, karik ha'u sei dehan ba ita tomak : "Ne'e hanesan kantikas soe iska, kari mehi midar, hodi hadau netik laran husi ema sira ne'ebe ohin loron klamar lao lahatene dalan fila, lakon esperansa, ka stres hela ho lalaok moris nebe sei nafatin sai mehi maske ain sorin iha ona rai kuak laran. Tamba née, ita nia hakarak sai ita nia KONSEKUENSIA." Hanoin née, karik los, karik mos sala boot tebes. Tamba née lian husi fuan ne'ebe lakon ona sentidu ba knananuk hotu nebe ohin loron la klaru hanesan la iha ona kor mutin ka metan maibe iha deit mak kor malahuk. Maibe, se karik ema ruma mosu hanoin oin seluk, dehan hanoin née lalos, karik keta lori ba lia tamba née mak hanaran DEMOKRASIA. Tamba, ha'u nia kakutak so hanoin deit, maibe ha'u nia laran mak iha kbi'it atu tetu no hakotu ba ida nebe mak mehi no ida nebe mak hare ho matan. Tamba ohin loron, ita barak mak hare, karik so ema matan delek no avo pai ne'ebe uja lenti mahar deit mak la hare. Dala wa'in ema barak mosu ho kantikas mesak furak iha tempu kampanha, maibe ikus kantikas hotu ne'ebe sira nia ibun hananu née, nafatin hanesan mehi no LA IHA SENTIDU IDA hodi hadi'ak netik povu nia moris, povu nia mehi. Dili, 07.06.16. Djoe Lari Mata