"FATUK IHA, BE LIMAN ?"

Ha'u lahatene hahalok nee mosu no belit los ona ho ha'u lolon to'o sai abut iha klamar, karik mosu hafoin ha'u estuda maka'as to'o matenek hodi sai tiha nune'e ka ambiente ransu malu mak influenza ha'u ka iha nanis ona wainhira ha'u moris ? Ahhh !!! Ha'u lahatene!!! Wainhira sei ki'ik kedas, ha'u ulun moruk, lakohi rona ema, sente a'an los mesak, ha'u la hakarak tebes se ema seluk matenek, badinas ka halo liu ha'u maske ha'u mos la beik ida. Nafatin badinas Kadi talentu nee. No ha'u la sente dikur AROGANSIA hahu moris matak husi loro ba loron ne'ebe ha'u liu daudaun. Ha'u sempre hanoin karik loron ida sai bo'ot nune'e bele realiza ha'u nia mehi ne'e. Tempu dolar nafatin ba oin, ohin ha'u hahu otas klosan no hakiak nafatin ai tahan nee. Husi ha'u nia esperencia, ha'u hanoin, karik, hahalok nee hanesan heransa nebe hatutan husi jerasaun ba jerasaun, ne'ebe la hakarak se ema seluk halo liu ha'u. Ha'u sei hanoin kona wainhira kolega eskola naran Manuel, nia lao hakbesik hodi bis-bisu ba ha'u iha loron ida hafoin ami sai eskola. "O bele duni bro..." "Ha'u la komprende saida mak O koalia." "Lae. Ha'u atu dehan deit, O iha duni zeitu atu soran ema sa..." Ha'u sente a'an lolos ema laiha sala, ha'u dada a'an, hakat dala ida ba kotuk no ho oin sin kahur hakfodak ha'u husu : "umhh... Be ha'u soran fali se ona mak O naran dun deit nee...?" "Uiihhh...., be O haluha ona ga ? Fulan kotuk Atoi ho Juaun baku malu to'o Atoi ami lori ba klinik, no O mos la ajuda tan. Tempu neba hafoin kurtibu, ha'u husu Atoi dehan O mak sadik sira atu baku malu. Nee O haluha ona ga ?" "Oohhh...hhhh.... heisaaa... Los !!! Ha'u mak soran sira. Lolos nee sira la baku malu ida, O hanoin ka lae..., uluk ita la halo PR...," Ha'u hateke ba leten, tau liman sanak ida ba reintoos hodi hanoin. "Uuummm.... fulan tolu liuba nee sa.., laos mestri haruka nia mak karolu ita ? depois laos nia hamnasa tan ita ?" Ho oin buis no kumu liman ha'u hateten ba nia, ha'u dada iis naruk hafoin ha'u hatutan : "aaaa... nemak ha'u odio hela hodi soran nia nee saaa, tan ha'u hatene nia sei la manan Juaun. Hahahhaha..." Derepente deit ha'u hamnasa hodi hatudu oin haksolok hanesan ha'u nia tusan selu ona ba Atoi no nia simu ona nia masin hodi fihir ba belun ne'ebe rona hela ha'u no tamba sa mak ha'u halo nune'e. "Neee... to ne mak ha'u dehan bele duni ne to ? " "Hahhahah... ne par fase nia matan !!!" Husi oras nia dulas, hahalok nee sai buras no nafatin haburas iha ha'u nia pagina moris. Katak, ha'u la gosta ema seluk halo liu ha'u. Nune'e ha'u hakmatek, haksolok no la sente sala ba a'an iha tempu ha'u halao lalaok ne'e. Maske ema seluk atu kanek, halerik, laran taridu, tauk no fakar matan been, maibe ha'u komfortabel los ho ha'u nia hakarak ne'e. Ha'u sei hatene momos no hanoin hetan bainhira sei klosan, ha'u konsege halo belun baluk hateke matan ikun ba malu, tu'u liman ba malu no atu han matak deit malu to'o atu mosu tiha funu ki'ik ida entre sira se sira la biban fo neon ba malu. Buat sira nee ho hanoin momos ha'u hakarak hamosu duni, nune'e bele sai sasukat ba ha'u nia hakarak nee katak bele ka lae, tamba ha'u ema nebe husi hun kedas ho hanoin nebe ulun moruk duni. Husi hahalok nee hotu ha'u hetan resultadu diak. Imi hatene ? Diak tebes !!! Hare ba oras ne'ebe nunka atu para, ohin loron ha'u sai bo'ot ona, ema hotu hatene se mak ha'u no se mak se no ha'u hatene momos se mak atu sai alvu eksperimen ba ha'u nia ambisaun tuir mai. Ha'u fiar ema hotu sei tauk nakdedar wainhira hasoru ha'u to'o asu fuik siramos so iha kbi'it atu hare deit to'o ba ha'u nia sapatu, la liu. Tamba sira tauk hodi hakruuk no sulan ikun ba kelen le'et wainhira ha'u hakat liu. Ha'u nia kbi'it hahu a'as daudaun sa'e ba kalohan neba, hanesan ai hun ida be hamriik mesak iha foho tutun, a'as no karik husi do'ok ema sei la sala siik, katak; nee laos ema seluk tan maibe ha'u no SO HA'U ! Ha'u mos sei la beik. Atu asegura ha'u nia poder, nune'e ha'u hakiak asu aman bobot no siak. Ha'u hanorin sira oinsa atu tata ema no la husik hela nehan fatin maske ema be tata nee mate ona. Nune'e wainhira ha'u halo ha'u nia asaun neim ema ida sei horon kois. No ha'u nafatin liman mos. Ha'u makas ka lae ??? Ha'u fiar tebes imi sei dehan ha'u nee makas duni. Se imi la rekonhese hhhmmm... KUIDADU !!! Ohin ha'u sai ona ema bo'ot. Nune'e ha'u hatene katak laiha ema ida sei halo liu ha'u ka hasoru ha'u nia hakarak. Se sira la tuir no la rona ha'u nia hakarak, ha'u rasik sei fahe rabisadu kadeia ba sira ho razaun sira iha hanoin atu halo SUBVERSIVO. Ha'u ohin loron iha forsa, tan nee bele halo saida deit tuir ha'u nia hakarak, sukit tun sukit sa'e, ema tata malu nune'e bele atinji ha'u nia hakarak, tamba ha'u modelo ema UTOPIA ida. Ne'ebe, sekarik ema seluk hakarak kontra, ha'u sei halo asaun agresivu hanesan ema PSIKOPAT, hodi obriga sira hili dalan rua : rekonhese ha'u ka HELENA. Hahu husi lalaok nee hotu, ha'u sai ona hanesan ema DROGADU bo'ot ida. Nune'e, se ha'u la halo asaun hanesan iha loron seluk, karik ha'u sei DEPRESI tamba ha'u SAKAW hela ho razaun tamba ha'u ADIKSAUN ona. Husi ha'u fatin, basa hirus matan, reket nehan hamnasa haksolok tamba bele halo sira tata malu. Ha'u basa hirus matan tamba tuir ha'u nee hanesan PRESTASAUN ne'ebe diak no treinamentu be susesu hodi lori sai matadalan iha futuru. Ha'u laliga saida mak sira dehan konaba ha'u tamba ha'u hatene no Maromak mos aseita katak ha'u sei moris rohan laek. No to'o loron ida Maromak bolu ha'u karik, Sao Pedro mos sei ho laran haksolok hodi loke odamatan lalehan mai ha'u. Be imi ??? Nee urusan pribadi. Comoro, 20.08.16. @Djoe Lari Mata