"Deskulpa oan, Ha'u kbi'it so nune'e."

Ha'u...
O aman
Obriga an sa'e foho tun foho
Hakat rai ida ba rai seluk
Loron ba kalan la'o haluha kolen
Kosar fakar liman fera sai maluk
Soe hela inan aman knua moris fatin
Tan de'it o, o ha'u murak rai

La'o habai loron manas
Lolon fase ho udan turuk
Ho pasensia sela naha iha ha'u kabaas
La'o iha esperansa bo'ot
Husi taka oin ho karau kulit
Fiar katak sei mosu anin fresku
Hodi sulin netik ba bikan laran atu hatutan ita moris
Ne'emos tan de'it o, o ha'u murak rai

Tuba rai metin foti oin maske futu kabun
Oin hamnasa hases lian halerik
Sai aihun no lilin ba o maske dala barak ha'u monu
Husi ha'u fuan, ho lian laek hakarak o bikan lamamuk
Ha'u promete, wainhira ha'u sei iha...
Ha'u lakohi halerik pinta iha o oin

Ha'u hatene...
Dala barak ha'u hirus, ha'u si'ak
Lahamnasa hamaluk, laistima o
Maibe husi nonok, ha'u hakarak hanorin o
Hanorin o aten bo'ot, hatene an
no atu iha kbi'it
Hasoru laloran moris loron aban
Nebe nafatin si'ak tuir nia tempu
Katak...
So ba o liman fuan, o sei tabele an ba
Laiha anju ka diabu mak sei tane o
Ha'u hanesan loro matan nebe hahu nakaras
Se lanafatin nunu'e iha o nia moris tomak

Ikus, ho laran dodok ha'u hase
Laiha buat furak mak sai presente
La'os lilin, la'os dosi kek tinan nian
La'os sasan furak ka ropa foun
Keta laran triste, fuan bo'ot ba !
Hatene ba, o aman kbi'it lato'o !
Maibe ho de'it liamenon mamuk ne'e
Hein katak bele haksolok netik o loron moris

Husi fatin do'ok
Husi ha'u to'os natar fatin buka moris
Hamaluk mata wen ha'u hato'o
PARABENS OAN DOBEN...
Ha'u klamar nafatin horik ho o

Bidau, 06.03.17
Djoe Lari Mata