"Tinan 15 ona, Ita nune'e nafatin ?"

"Ita nia prosesu clearence husi importadora XYZ to'o iha nebe ona." Chefe husu. Hanesan ran sa'e to'o babota, ran baruk ona atu sulin wainhira rona lian husu ne'e. Ha'u dada iis naruk, huu sai hikas hodi lakiung lakaung, nonok ba lian rihun iha ha'u nia fatin. Iha fatin ne'e ha'u halo kna'ar liu tinan barak hodi buka osan sustenta uma laran. Fatin ne'e hanesan ha'u nia to'os ho natar no komputador mak sai hanesan makina sentral atu hala'o servisu. Nia sai ona hanesan : "Fatin halot arkivu..." "Fatin sulan dokumentus hotu, tantu konseitu, formatu, lista, to'o dokumentus hotu konaba ha'u nia aktividades hotu." Dokumentus sira ne'e bele asesu ka funsiona so depende de'it ba buat ida. So nia mak iha kbi'it hodi dudu komputador halo nia kna'ar, fo hanoin ba komputador atu loke dokumentus nebe ha'u hakarak no obriga printer produs dokumentus. Maibe to'o ohin, karik liu ona oras hat nulu resin nen, nia sei namlaek hela, dukur hakmatek, karik mehi hela iha ninia toba fatin, maske ami tatoli ona ba nia na'in atu fanun nia. Ho laran todan, ha'u lahasai lian hatan ba ha'u nia superior hierarki, ho de'it matan no ulun, koko lori chefe nia hanoin ba ninia pergunta rasik. Ho oin inosente, hanesan foin monu husi fulan, nia hakbesik hodi husu, "Nusa... iha problema ruma konaba komputador ka ?" "Nusa O lahere mesak de'it... O hanoin ha'u atu halo milagre ka ?" Ha'u hatan de'it iha laran. Ha'u nafatin la hatan hodi doko de'it ulun. "Entaun problema sa'ida ?" Husi parte seluk, Ha'u nia chefe lahatene kondisaun atual tan loron rua liuba tuir hela enkortru ho ema bo'ot sira iha uma bo'ot laran. Ha'u hakru'uk lamas tali metan nebe sanak ba mai husi komputador ba printer, husi monitor ba CPU no ikus dada hamutuk iha terminal ida nebe latan hela iha rai leten. Liman sanak ida hatudu ba lampu terminal nebe mate hela. Ikus, ha'u nia chefe hatan mesak ninia perguntas no nia hatene momos katak, loron hirak ne'e servisu lala'o AFINAL tan "AHI MATE". Husi ha'u nia fatin, matan ikun fai kona chefe nia oin nebe naburut, ibun bok an tun sa'e hanesan lia nain sira wainhira hamulak no ikus nia hamrik lamas save sa'e kareta ba kedas EDTL hodi resolve problema ne'e. Caicoli, 15.02.17 Djoe Lari Mata