"HALO vs GARGANTA"

Wainhira ha'u sei hamrik iha liur, hateke ba uma andar ida. Ha'u hare ema barak nebe gasta tempu barak, maibe hatudu latuir sa'ida mak uluk sira hananu, sira haklalak. Pelu menus to'o netik klaran, maibe buat sira ne'e lamosu, sira lahatudu. Iha ha'u laran, tantu atu falun ho laran moras ka lae, ha'u fiar an koalia ba an no ba ema seluk, "ha'u bele halo liu sira, ho fasil to'o uma neba nia kakuluk, la to'o oras, se lae minutu nia laran de'it mos bele." "Ahhh... garganta de'it." Anin fuik hase. Ha'u hatan, "Ha'u bele hatudu se o lafiar." Basa hirus matan ha'u koalia naha laiha, buat hotu fasil, hananu tuir ha'u nia gostu no hanoin tan sente an MATENEK liu sira. Ho tempu nia sulin, ha'u mos hetan fiar husi maluk hotu atu realiza hanoin sira ne'e, foufoun, sei ho espiritu '75 ha'u nafatin dehan ba an, "ahhh... fasil. Ha'u sei loke sira nia matan katak ha'u bele duni." Ho fiar an nafurin iha babota, ha'u hahu hakat ba dahuluk. Teki-teki de'it mosu iha ha'u nia sorsorin buat hotu foun, fuik, sai bilang da costa mesak iha fatin. Nune'e halo ha'u hanoin semo lakon, kolen, iis ida rua, no lahatene ona atu hakat ba nebe. Maibe hakat ba daruak mos hein hela ba ain atu bok an. Ha'u sai tiha hanesan bebe oan nebe foin moris iha ema sira nebe durante ne'e ha'u hasara, ho ha'u ibun be sente morin liu ne'e. "Los too...? O mos kabeen bo'ot hanesan sira ? Hohohooooo... maluk, 'katakan yang benar walau itu pahit'. Introspeksaun ba an furak liu. Ok ?" Anin fuik mosu hikas hodi hase ho oin sinis no hasara. "Bou... buat hotu iha prosesu. Fo tempu par ha'u bele hatudu." Lais tebes ha'u hatan atu hakotu tiha lia hase ne'e. Maibe husi hanoin ne'e nia fukun, ha'u hanesan ema nebe sai bumerang ba ha'u nia liafuan rasik. Ha'u hakdasak iha fatin, hanesan aihun nebe anin bo'ot fokit nia abut husi rai laran. Ha'u, laiha kbi'it, moe ba an, kutun maten sulin hamutuk no sai lihun ida mout ho sira nebe uluk iha matan okos, iha sapatu okos, ho sira nia nivel edukasaun nebe so iha sira nia mehi laran de'it mak bele hanesan ha'u ne'e. Ho haklenak, mosu roman mihis nebe halibur no fanun neon. Konsensia mosu. Halo ha'u hanoin hetan fali belun ida nia liafuan, katak, "se o hakarak hatene asu nia lian, o tenke sai asu." Karik imi husu, relasaun liafuan ne'e sa'ida ho ha'u nia hakat ? Ok. Ha'u dehan. Ne'e hanesan aiknanoik nebe fo hanoin mai ha'u atu koalia karik SUKAT IBUN, koalia buat ida karik, koalia sa'ida mak ha'u hatene lolos husi nia hun to'o abut, buat nebe ha'u sai ona ida ho nia, hatene ninia lalaok tomak. Ho realidade nebe ha'u hasoru. Ha'u labiban hakat lais tuir sa'ida mak ha'u hanoin antes, ho moe laek ha'u lambe fali kabeen nebe tafui ona maske sira lahasara. Ami hotu mout iha kalohan malahuk, maske haka'as an nafatin hakat, sidi no hakat ba oin nafatin. Ikus liu, Husi esperensia nebe fahe ba ha'u bikan laran rasik, fo hanoin hikas ba ha'u, katak, "furak se ita hananu, haklalak no hakilar tuir buat nebe liman kaer, sente, hatene monos no LALIKA kanta ba buat ida nebe sei tesi ita nia ain-klor rasik." Caicoli, 27.02.17 Djoe Lari Mata