"Lixu ho nia fatin."

Hau !
Los. Ha'u.
Ha'u hatene aan !
Katak : "ha'u restu husi buat hotu nia restu nebe lafolin"
Ha'u la moe no simu realidade ne'e
To'o nebe de'it, iha nebe de'it mos
Ha'u nia folin mukit nanis
Ha'u mak nune'e ona no nune'e mak ha'u

Husi ha'u fatin
Wainhira ha'u foti matan hare sorsorin
Ba edefisiu bobo'ot be hamrik loko-an
Ba dalan protokolu nebe nahe kaber
Ha'u moe, "moe ida ha'nusa..."

Iha ha'u oin...
Hamrik edefisiu bo'ot husi instituisaun konhesidu
Nebe lagosta tebes ha'u nia oin
Nebe ho ninia tekniku sira ho kursu mesak to'o kalohan
Hetan doasaun oioin husi NGO internasional
Nebe dehan : "ha'u tenke halakon husi rai ne'e."

Iha ha'u sorin...
Latan ho luxu, rai ho kulit metan kaber
Ema hanaran estrada bo'ot
Husi parte saneanentu isin katar se hare fo'er
Foer sa'ida de'it
Hanoin no hakarak husi ema sira be tau aas sidade nia furak
To'o laek sira nia animal barak sai vitima
To'o laek sira nia tiga roda lulun aan iha trek laran
Hakarak sidade mos maske kabun halerik

Hoi...!!!
Ohin, Iha nebe ona imi
Hare ba ha'u nia kondisaun ne'e
Hare ba ha'u nebe naklekar an iha fatin publiku
Hare ba ha'u nebe livre semo ba mai
Imi iha nebe ?
Se mak moe, ha'u ka imi ?
Hah !?!?
Tfuiiikkkk...

Hoi...!!!
Imi sira be badinas les ibun-kuak iha media
Imi sira be tama sai knua hakilar moris saudavel
Nusa imi nonok, Ka imi delek ona ?
Nusa la haklalak lian hafera rai ?
Ka finzi la'o liu laliga rai, naran katak programa hala'o, ful-fulan salariu
sulin nafatin ?

Hoi...!!!
Imi sira be dehan :
Sidade nudar imagem nasaun
Moras hada'et tenke hatun
Imi iha ona nebe ?
Iha ona ICU ka stadium koma hela ?
Ha'u beik, foer no folin laek
Maibe se hanoin ho neon momos
Karik orasamentu ba viagem internasional bele hada hela luhan simples ida mai ha'u
Nusa imi lahanoin konaba ne'e ?
Ka imi nia bolsu importante liu ?
Ne'e so imi rasik mak bele hatan ho neon tuir promesa nebe imi hasai ona iha loron simu toma da posse.

Caicoli, 04.04.17
Djoe Lari Mata