"IMIGRASAUN"

Iha loron ferias ne'e, loron sesta feira santa, nebe tuir ema fiar kristaun nian katak ohin loron triste nian. Tamba hanoin no selebra hikas loron ema maksalak sira futu lia, hasara, hewai, hamoe no ikus lori besi kusa prega Nai Jesus ba kruz. Iha loron ne'e, ha'u hare no sente buat hotu hakmatek, falun ho sentimentu triste nian, tantu ema, aihoris ka animal sira hotu hakmatek ho ida-idak nia moris. Karik espiritu nee mak sei kuda metin iha "OKNUM" maun alin balun nia kakutak, hodi nafatin dukur wainhira halo sira nia kna'ar.

Ho tempu nebe iha, halo ha'u hanoin no hateke hikas ba kotuk. Ba lala'ok nebe ema barak laliga, hare de'it ho matan ikun, maibe ninia tarak sona borus fuan to'o atu kura mos ladi'ak. Tamba lala'ok ne'e mak to'o ikus halo ema rai nain sira sai bainaka iha sira nia uman rasik. To'o ikus, ita atu tuu liman ba malu mos labiban ona ka ema dehan "lahetan boi..." ka "kacian deh luu...", tamba maun alin sira nebe lolos sai lutu ba lala'ok ne'e sei tur hakmatek, kebit halimar hela ho sira nia interese no hare ba lala'ok ne'e la'os ona sira nia parte, to'o sei iha biban hodi hateten, "nee U boot."

Iha ha'u nebe hahu sai "LA'O RAI" iha "RAIN RASIK" ne'e nia matan, hare momos, iha ema li'ur nebe halo kna'ar, buka lukru maibe barak mak uza vistu turista. Klaru katak ha'u lanega sei iha maun alin balun nebe servisu ho fuan no laran. Tebes, sira mai loke kampu servisu, maibe tamba sa mak lala'ok ne'e aumenta ba bebeik ?

Karik kuda sasin interese iha laran ? Karik imi hotu nia hakarak aban bainrua ita nia dapur laran mos sira sukit liman ba mai, hodi halo ita hanesan bainaka ?

Husi ha'u matan nebe la'os matenek nain ka peritu ba lala'ok ne'e so iha kbi'it atu dehan,

"Ha'u maun alin sira, ha'u hare imi tur iha rai, iha tasi no iha kalohan. Maibe husi lala'ok nebe hatudu, imi hare ka finzi piska matan hare liu de'it ? Ha'u lahusu ba imi nia matan, maibe ba imi nia neon, imi nia laran nudar kriatura rai nain husi rai ne'e nia oan. Karik imi hatene ? Ka AMPLOP maka taka ona imi nia janela hanoin ? Husi lala'ok nebe hatudu, klaru katak ema rai li'ur tama no sai avontade no halo kna'ar ho livre iha rai nee nia leten ? Haloooo... keta dukur. Hader ona ba. Nee la'os de'it atu di'ak ba ita ohin loron maibe ba ita nia beioan mos iha futuru."

Ha'u mos hanoin hetan, iha fulan kotuk liuba, maluk sira balun iha uma fukun neba sukit kona konaba imi nia lala'ok. Sira garganta dehan atu harii netik lutu hodi asegura imi hodi hala'o knar. Maibe to'o ohin, liafuan sira be sira hasai, suar lakon tiha ona iha kalohan laran. Mout ona iha anin huu, nune'e larona hikas ninia kontinuasaun ne'e to'o nebe ona.

Ha'u hanoin, "Karik iha tempu neba foin hader husi mehi mak naran koalia ? Ka halo sensasi hodi taka falta katak sira simu vitalisia ho regalias oioin lasaugate, maibe hatudu ba media katak sira halo servisu maka'as duni ? (Deskulpa, so ba media. Tamba ba ha'u nebe mukit nee seidauk sente saida mak imi haklalak nee liuliu konaba kria lei imigrasaun hodi kontrola ema rai liur nia movimentu iha rai ne'e nia laran). Ka nudaar materia kampanya nebe ninia bankada orienta ?" Ha'u lahatene. Maibe klaru katak iha notisia sira kokorek duni konaba lalaok ne'e.

Nune'e, ho tempu nebe fo biban ba ita atu kasu sala nee, tempu paskua, karik mosu grasa espiritu, mai tur iha ita nia babota, hodi fo kbi'it leno ita aan, hakma'an ain ba konfesa salan no promete hadi'an aan iha loron mai. Hodi halo ita kna'ar livre husi intereses hotu.

Bidau, 14.04.17

Djoe Lari Mata