"Ha'u la'os arame"

Iha uma ida, kakuluk ida nia okos Ita la'o hamutuk tuir dalan ne'e hahu kle'ur no dook ona. Ita hatene ona kurva hira, dalan sanak hira, dalan kaber iha nebe nomos dalan sokata iha oituan nebe molok to'o ba ita destinasaun. Naha tomak ita fahe ba malu no hulan troka malun. Ikus, hanesan o nia liman sorin, o fahe roupa iha o lolon ba ha'u, tan dehan, "ha'u fi'ar iha o kbi'it. O bele hatutan dalan be ha'u hahu ona no la'o hanaruk ha'u ain fatin." 

Ha'u lahatane sa'ida mak falun husi liafuan nebe o hasai ona. Karik temperus barak nebe kahur, keta rai subar hela veneno iha laran ? Ne'e so o mak hatene. Ba ha'u, ha'u lahatene. No ba roupa nee merese ba ha'u atu tau, tan ha'u hatene katak dalan nee hanesan aihoris ida, tahan tuan sei monu no troka ho tahan matak. Roupa nee la'os presente maibe dalan ne'e nia sulin mak nune'e ona, no ita hotu tenke hatene katak roupa nee la'os ita nia kusta atu lori to'o ain tama rai ku'ak.

Ohin, Ha'u hahu la'o mesak ona. Fofoun ha'u tuda ain ba oin, o hamnasa, o haksolok, karik iha o laran hanoin : "roupa ne'e monu ba ema nebe la sala, hein katak bele hatutan o ain tuir dalan nebe ita dekor ona." Maibe fuan ne'e atu mutuk salsala wainhira ha'u hatutan hakat ida ba seluk. Iha ha'u matan, midar hotu nebe o hatudu hahu malahuk ona, ibun hahu sakat ba mai, mosu lian husu nebe o rasik sei hatan ba o nia perguntas rasik. O hahu badinas ona hatudu liman, hare ha'u lolos diabu fihir kruz. Tamba sa bele sai nune'e ? Se o lasimu ha'u, uluk, sei iha tahan matak barak bele troka ha'u fatin. Tansa ikus bele mosu nune'e ?

Karik uluk o hanoin, ha'u hanesan arame nebe o fasil atu silu kle'uk ba mai tuir o ibun hananu ? Hah !?!? Deskulpa, karik ha'u dehan : "o sala boot." Ha'u hakruk, la'os dehan katak ita nia hanoin hanesan maibe ita ekipa ida, presija la'o iha linha ida. No korenti hierarkia mak kesi ita atu kumpri ordem maske fuan nee dodok ba dodok. Maibe ohin, ha'u iha ona kbi'it hodi hamrik iha ain rasik no la'o uja kakutak rasik. Karik o haluha ? Ne'eduni, deskulpa de'it se ha'u nia dalan ses husi o nia hanoin. Tamba iha uma ida nia laran, ema ida-idak iha hanoin rasik atu lori uma ne'e ba ninia futuru nebe diak.

Bidau, 15.04.17

Djoe Lari Mata