"MATENEK LOLOS O NA'IN"

Husi liman nee rasik, ho aisu'ak nebe simples tebes. Ha'u fila rai, hamos du'ut, halot fatuk no kuda aihoris wainhira tempu mamuk iha uma kotuk. Ha'u koko kuda aihoris nebe lalais  bele uja, hanesan ruku, du'ut morin, aimanas, aidila, kinor, ailia no fehuk. Ikus sai kintal ida be ho luan nebe naton. Maske kosar sulin no lalin bee husi fatin dook, maibe ha'u bele hare aihoris tomak moris ho haksolok ho tahan nebe matak no bidu haklalak wainhira anin hase.

Aihoris tomak nafatin aumenta boot no aas, dolar halo nakonu fatin nebe sei mamuk, pinta ha'u nia kintal tomak ho kor matak. "Ha'u nia kosar monu ba rai, liman ampolas to'o nakfera, no hulan bee husi fatin dook nia resultadu : La saugate." Ha'u hanoin iha laran wainhira matan nee hateke hetan aihoris nebe moris ho buras molok dader-dader hakat ain sai husi uma ba servisu fatin.

Maibe Iha dadersan ida, tempu ha'u hader husi toba fatin, sa'ida mak ha'u nia matan hare ? Ha'u sente hanesan dezastru ida kona ha'u, halo ha'u neon hare kalohan sai nakukun, loro-matan subar aan no anin dader baruk ona atu huu hase. Hot-hotu hakmatek, nonok no la liga. Halo ha'u nia fuan tuku maka'as, ran sulin to'o kakutak wainhira husi matan nee rasik hare animal nebe hanoin laiha, sobu ho livre, sukit ba mai, han badak aihoris nia tahan hotu. Aat liu tan mak, nia sei iha tempu atu mi no tee tan iha kintal laran wainhira han bosu ona. Lala'ok nee hanesan ema nebe kuda tanjerinha maibe nia fuan fali derok sin.

Ho laran nebe moras, oin sai mean kahur pintura buis, liman nakdedar, hodi nee ha'u obriga aan sasin hela liafuan ba animal sira ho nia nain be ha'u respeito. Tamba ha'u sente, ha'u kbi'it mukit tebes hodi fo hanoin diretamente ba animal na'in no ha'u ema nebe lakohi buka lia tan de'it lalaok naksalak nee.

 Tan nee ha'u hakerek,

              "FAHI"
O moris livre iha sidade
Tama sai laiha lisensa
Hatene oras nebe seguru
Hanesan iha paraizo o pasa ferias

Badinas fila rai, halot aihoris
Avontade sasurut aihoris no sobak tuir gostu
Karik o hanoin,
"Ema kuda par atu kura o nia matabisu ka merenda."
O matenek duni lolos o nia nain

Nune'e...
Merese ba o no o maluk sira
Se walikota aruma imi iha trek laran
Diman imi, duni no sona imi
To'o oho imi

So nee mak bele ha'u hato'o
Hein katak o ho o nia nain bele muda hanoin
Katak : ema nia sasan presija ita respeitu
Katak : ita sei lasimu se mosu ba ita

Ikus...
Hein katak imi bele rona
No Kmanek ba ita hotu

Hafoin hakerek hotu liafuan ne'e, maske lakura ha'u nia laran nebe sei moras, maibe pelo menus ko'a ona naha balun nebe ha'u nia laran hulan hela. Hein katak, ita tomak bele iha konsensia no bele respeitu mos ema seluk nia sasan hodi hases ita husi lian naksalak no hateke malu hanesan busa ho laho.

Bidau, 10.04.17
Djoe Lari Mata

Komentar

Posting Komentar

Postingan populer dari blog ini

"Se Mak Ha'u?"

Husi rai nebe maioria nakonu ho fatuk ahu-ruin, ohin ema hanaran Baucau ka malae sira hanaran 'Vila Salazar', husi oan mane mesak ida eis soldadu tempu Portuguse, eis hela fatin iha asrama Taibesi, nebe dedika an tomak sai kondutor (kamineta, inumok, vaskolante, trator to'o karihho) ba kuaze nia moris tomak iha moris misaun nian. Liafuan 'misaun' sai ona nudar nia iis moris, iha hahalok nomos fiar. Lahatene, tragedia sa'ida mak mosu, karik mesak monu husi kalohan ka milagre. Nune'e, nia hetan feto ida. Feto husi rai nebe nahe ho fatuk "afa-kai" iha rai Saga-dete neba. Feto ida nebe haraik an laran maus, lagosta koalia barak no iha klamar sai lideransa. Ikus sira sasin ran iha domin hodi sai ami inan aman. Hafoin hakur liu ondas bo'ot naksalak barak iha uma laran, situasaun politika nebe lafasil, laloran naha ekonomiku nebe todan, sira fahe presente murak ba sira familia no ba sira an mos. Liu husi hahoris oan mane ida nebe ha'u bolu maun ...
Baca selengkapnya

"Do'ok sai besik, Besik sai do'ok."

Ha'u ema foho, moris iha foho no hahalokmos hanesan ema foho. Iha tempu ha'u sei SD klase 0, ha'u la hanoin kona liu dalan oinsa ema kontaktu malu wainhira do'ok husi malu. Tamba tempu hotu be furak liu ba ha'u mak so uja ba halimar. Hatene mak halimar no halimar no tempu duni atu halimar. Hafoin tama klase 4 SD mak foin hatene kois wainhira ema kontaktu malu atu fahe info husi ema ida ba seluk liu husi hakerek surat. No iha tempu neba, se la sala maluk sira (bapa oan) uja "sahabat Pena" hodi kontaktu malu husi rai ida ba rai seluk no ba asuntu importante ema boot sira uja telegrama ne'ebe sente sei lais liu duke surat. Hafoin ha'u sae ba klase 6 SD, hahu eskola hamutuk ho bapa oan sira, ha'u iha oportunidade hodi aprende netik buat ruma husi sira. Ha'u sei hanoin wainhira ami tuir les bahasa Indonesia, sira hanorin sira nia lian mai ami, konta istoria labarik nian oioin mai ami, no molok fila ba uma ami sei halimar hamutuk iha salaun e...
Baca selengkapnya

"Parabens Oan"

Loron la'o halo'ot ba kalan Fera liman hisik kosar Lian halerik falun nonok laran Nafatin hakat ain maske susar Loron la'o la sente kolen Kosar turuk maran iha lolon Tan hakarak tuni ita bikan Ba loron aas bikan naton La sente oras dulas lais Duni mehi hodi hulan naha Karik "O" neon lahoman ho tanis Katak iha ne'e, O ami haluha Laran ne'e moras Se ohin ami liman mamuk La buat furak ami hasa'e ba aas Ho buat laek iha orasaun hato'o hamaluk Bidau, 18.04.17 Djoe Lari Mata
Baca selengkapnya