"KINTAL KI'IK"

Dader nebe kmanek, loron matan piska matan naton, kalohan falun lamahar, anin huu hamaus, kili matan atu latan hikas ba kama leten hafoin hader. Lahanesan loron baibain, husi fatin ne'e, iha fatin ne'e, fatin nebe foin sama ain oras hat nulu resin ualu ba ne'e, fatin kos. Sai husi kuartu, sente buat hotu foun. Ha'u koko hakat sai, hamrik iha uma ne'e nia kotuk nebe saimos hanesan varanda. 

Ha'u hahu lori matan badiu tun sa'e husi sorsorin. Maibe fila-fila matan sidi kona ha'u nia kintal ki'ik, nebe horseik mak halo, nebe halo liman laran ampolas hotu tan ha'u kria kintal ne'e. Iha ha'u laran mosu hanoin, "maske o ki'ik, maibe   ha'u foin mak hahu no o nia folin bo'ot tebes. Bele haksolok ha'u laran. La'os buat bo'ot hotu hahu husi ki'ik ? Los ka lae ?" Ha'u husu ba an.

Ho matan malahuk kahur laran triste, hare ba aihoris nebe foin kuda. Ba aidila oan hun tolu, nebe hahu hamrik ho kbi'it laek, nia hun hahu oin muron, namlele no tahan hase ho baruk wainhira anin huu liu nia oin tan hahu namlaek. Tan ne'e, ho laran hanoin netik, lori bee hodi rega. Iha hanoin, "karik bee ne'e bele fahe hikas haksolok nebe nia lakon, tan muda fatin hodi moris foun iha fatin seluk." 

"Obrigadu, ita bo'ot fahe ona bee malirin hodi kura hamrok. Tan ha'u presija duni iha rai be manas ne'e." Nia hatan, liu husi nia lolon nebe hahu matak, tahan baku liman ba mai wainhira anin la'o liu. 

Ho badinas nebe ha'u iha, laran sai todan tamba ambiente nebe la suporta. Husi fatin ne'e, fatin nebe susar ba bee, animal sira hetan ninia liberdade hodi la'o avontade no fatin labarik sira halai tun sa'e laiha hanoin atu kuidadu netik ema nia aihoris nebe kuda ona.

Ho realidade nebe iha, halo kakutak sai malahuk, katak, nia sei konsege moris ka bele mate iha loron hirak tuirmai ? Ha'u lahatene. Maibe husi ha'u nia liman fatin loron barak liu ona, ha'u fiar katak nia sei moris. Sei haburas kintal ki'ik nebe ha'u halo. Maibe mos ha'u labele haluha, sei mosu lutu nebe hateten ona iha leten. Sei sai naha nebe satan nia dalan atu moris ho hakmatek tuir hanoin nebe iha. Nune'e, perpara aisanak balun hodi lutu netik aihoris nebe kuda ona, nafatin kuidadu ho fuan tomak hanesan ha'u hare ha'u nia an rasik. Hein katak, kintal ne'e bele sai bo'ot no buras ho aihoris oioin iha loron barak tuirmai.

Bidau, 04.03.17

Djoe Lari Mata