"LALORAN SERVISU"

Iha loron ida, loron lamanas udan mos latau, ha'u hola fatin iha dadalia entre kna'ar nain husi dirasaun ida ho nai ulun nebe bo'ot tuir eskada hierarkia. Iha neba, mosu ho kakutak mesak nabilan, kada cefe departamento hato'o ninia planu aktividades, orsamentu, atinzimentu no kahur ho kalohan nakukun preokupasaun nebe babain falun hela sira nia hakat wainhira hala'o sira nia kna'ar. Ida-idak hato'o ninia hanoin hanesan politika nain nebe halo orasaun iha palku leten, la sidi no mesak furak. Hafoin cefe tomak fakar sai sira nia hanoin, ema bo'ot hatan hodi fo dalan klaran ba naksalak nebe cefe sira hasoru. Mosu mos tempu ba funsionario ki'ik sira hodi lekar sai sira nia kalohan metan nebe falun sira nia kakutak durante ne'e. Husi ha'u nia sorin kwanan, belun ida hamrik ho oin nebe baruk atu hamnasa, nia hi'it liman sanak molok hasa'e lian, "Ha'u hori uluk kedas to'o agora, nafatin level tolu, tekniku administrativu, maibe realidade ami kaer fali serbisu nudar tekniku profesional nian. Maibe ikus, mosu maluk foun nebe tebretek koalia dehan 'ami lahalo buat ida', ha'u no ami lasimu. Husu cefe tau atensaun ba lalaok ne'e, ba maluk foin tama sira, atu sukat ibun wainhira koalia maske sira nia kursu bo'ot liu ami. Atu ita nafatin hakat ida ba ita nia mehi." "Ha'u dala barak ajuda fali departamentu seluk, halo ida ne'e ida neba, la tuir ha'u nia termo de referensia nebe iha, maibe desempenho nunka di'ak." Belun seluk hatutan. "Husu ba cefe atu labele ejiji relatorio ida ne'e ida neba, tan ami tenke suporta programa ida ne'e ida neba. No ami nia ema limita tebes. Oinsa bele halo buat barak ho tempu nebe badak ? Karik cefe sira mos bele konsidera lala'ok ne'e molok fo ordem." Belun seluk tan hatutan. "Ha'u ba tiha tuir treinamentu iha liur, hetan kapasitasaun konaba gestaun no oinsa hala'o inspesaun ba sasan sira nia kualidade, ehh... fila mai muda fali ha'u ba departamentu nebe la relevante. Entaun saugate de'it. Se bele karik muda ema tuir ninia konhesimentu. Obrigado." Hatudu oin baar, la satisfas hanesan tolan kaben moruk belun ne'e hatutan. "Ha'u... bla... bla... bla..." "Ha'u... bla... bla... bla..." "Ha'u... bla... bla... bla..." Belun barak mak hato'o sira nia preokupasaun. Hafoin lian halerik hotu fakar sai, nai ulun, ulun bo'ot sira simu surat tahan ida nebe hori ohin kedas, sekretaria hakruk hodi hakerek ne'e. Hatudu oin hakmatek, nia loke ibun, loke hanoin no fahe solusaun hanesan es-krim nebe mosu derepente iha ema laran manas nia liman. Nia dehan, "Ita bo'ot sira keta laran kii, keta laran susar. Hare servisu nudar ekipa. Tuir lolos, Hare ba imi nia dirasaun, seidauk bele priense kriteria atu sai dirasaun ida tuir regulamentu FP nian. Maibe ita hakarak hadi'a buat baluk tuir ita bele, tuir ita iha." Hafoin dada iis oituan, nia hatutan,... "Los, ke ita ema limita. Ne'e problema klasiku. Maibe la'os dehan katak ita atu tur tane hasan hodi hamosu buat hotu. Los ka lae ? Ita tenke servisu nudar team, suporta malu tuir ita kbi'it no ida ne'e hanesan mos tempu atu ita bo'ot sira atu aprende tan buat seluk, hasa'e kunhesimentu. Nune'e, wainhira imi hetan fiar karik, la'os ona buat foun ba imi atu lidera. Ami be nain hira ne'e, la'os atu tur metin nafatin iha fatin. Tempu ruma sei iha mudansa." Nia para derepente, hanesan kakorok maran los ona, nune'e horut tiha aqua turuk baluk, nia hatutan, "Tan ne'e, dala ida tan, tenke suporta malu no fleksibel wainhira hala'o kna'ar. Ne'emak ita hotu nia responsavel nudar ajente publiku, hodi serbi ita nia maluk sira. Tan ema balun iha liur neba, lahatene imi dedika an ka lae, sira hatene mak buka ita nia falta. No hananu tuir sira gostu nein oferese solusaun nebe iha atu hadi'a. Maibe ha'u husu itu ita labele lakon konfianse nebe tula iha ita nia kabaas leten. Mak ne'e de'it, obrigada." Husi ideias hotu nebe mosu, ha'u mesak hanoin hodi dasa hamutuk ba futun ida. Maibe hanesan ha'u hare, sei mosu iha dirasaun balun, instituisaun balun, ema balun halo servisu oituan, la seriu, halimar hela game, no balun la'o sai atu dadalia halimar hodi fuma sigaru, lakon tempu minutu ba minutu, maske maluk barak halo kna'ar mate an. Maibe ikus, ita rame-rame forma iha banko hodi simu salariu hanesan. Ne'e buat ida ke la justu. Maibe husi hanoin hotu nebe ha'u kuru, bou hamutuk iha kakutak halo ha'u hanoin atu ke'e kle'en liu tan, hodi hase ha'u klamar, katak, sei di'ak ita uza anin foun nebe iha maske falun manas ka malirin, hodi la manha tun sa'e, ejiji ba mai. Tan anin foun ne'e, maun alin barak iha liur hamrok hela, maibe susar atu hetan. Lahatene tamba sa. Tan sa'ida mak to'o ohin loron nafatin huu hale'u iha nia husar. Tantu aman sarani mak laiha ka ? ka kualidade ? ka anin ne'e mak laiha duni ? Ha'u lahatene. Tan ne'e, agradese no aproveita ba ho di'ak, maske dala wa'in latuir ita hakarak. Caicoli, 23.02.17 Djoe Lari Mata