"KOLEGA"

Hanesan baibain, Ameta ba servisu dadersan, meudia han iha warung no to'o lorokraik mak fila uma. Lala'ok ne'e hanesan ona ponteiru reloziu nebe nia  dulas fila-fila liu husi numeru nebe hanesan ba minutu ida. So sabdu ho domingu mak la mosu nune'e tan loron ferias. Laiha naksalak ruma mak hare hetan iha ninia uma kain.

Husi ninia uma laran mos la'o hanesan anin huu hakmatek no buat hotu furak iha sira nia le'et. Nia fen no oan mos hala'o rutinitas hanesan baibain. Deder perpara matabisu, tuku walu lori oan feto Anata ba eskola, tuku sanulu resin rua ba foti Anata iha eskola. No hala'o servisu uma nian hanesan : fase bikan kanuru fo'er, dasa rai, te'in no fase ropa foer sira. Iha loron ida, wainhira ferik oan atu fase faru fo'er, nia hare noda mean ida belit iha faru nia liman karuk. Nia foti besik atu hare, teki-teki nia inus horon kona mina morin ne'ebe la'os baibain Ameta uja. "Aehhh... morin ne'e ha'u nunka horon." Nia hanoin de'it iha laran.

Iha sesta lokraik, wainhira fila uma, Ameta fadigadu los hanesan ema tur iha bee manas leten. Nia tur lametin. Ninia hahalok lahanesan baibain, nune'e nia fen hase, 

"Nusa o lahakmatek los ne ?" 

"Ohhh... ha'u prepara an atu ba asisti kolega nia festa kazamentu."

"Kazamentu ka kazamentu ?"

"He'isa... se lafiar hare konvite iha pasta laran neba." Hatudu oin buis, Ameta nia liman sanak hatudu ba pasta nebe rai hela iha mezinha leten.

"Ohhh..."  

Ameta ba festa no fila dadersan. Buat hotu la'o baibain. Maibe wainhira nia fen atu ba fase faru fo'er, mosu hikas iis nebe nia horon loron hira liuba. Tan deskonfia, nia fen mos fanun Ameta hodi husu, "Meta. Horkalan o ba festa ho se ?"

"Ohhh... ha'u ba hamutuk ho kolega..."

Nia fen mos lahusu tan no la'o hamaluk ho ninia perguntas hotu iha de'it laran.

Dili, 24.02.17

Djoe Lari Mata