"MATENEK, HATUDU BA IHA REALIDADE"

Iha mundu, ema hotu hakarak sai bo'ot. Se mak dehan fali nia lakohi sai bo'ot ?  Tfuuuiikkk.... Ha'u lafiar ! Realidade hatudu ona, katak krize mosu, la seluk la le'et tan de'it iha balun hadau malu hakarak sai bo'ot. Uuppsss...! Ha'u sei la koalia dok liu ba neba, maibe hanesan exemplu de'it. Iha biban ne'e, ha'u hakarak hato'o de'it konaba lala'ok ne'e, lala'ok hakarak sai bo'ot nebe ladok husi ha'u nia sorsorin.

Hanesan ema hotu nia hanoin, sira hakarak tantu sai presidente, ministru, vice ministru, diretores, sefi departamantu, sefi unidade eh bele mos sai sefi konstruksaun ka mandor. Nune'e mos ha'u. Ho fiar an koalia tamba : matenek ha'u iha, se kompara ho seluk iha uma nebe ha'u hela ba ne'e nia kakuluk okos, karik ami tolu ka hat de'it mak matenek liu, tuir sertifikadu hatudu.

Ho peritu nebe ha'u iha, seluk hahu kuda liras ba ha'u lolon, ba ha'u kabaas. Ho ambisaun nebe buras nanis iha ha'u laran, ikus halo ha'u sai kma'an no namlele iha kalohan leten hanesan manu-lin nebe semo lata'uk atu monu. Loron ba fulan to'o tama tinan, ha'u nafatin tolan matenek. Semo ba mai tantu iha rai laran ka ba liur. Liu husi enkontru, workshop, treinamentu tantu lokal ka internasional, seminar no seluk tan. Ho matenek nebe ha'u iha, sempre ha'u hatudu liu de'it husi anin, foto no filmagem/video.

Karik imi balun husu, "Oooouuu... se sai bo'ot dehan tamba matenek. Maibe se hatudu de'it nune'e, entaun ha'u mos bele. Ninia benefisiu sa'ida mak o halo no hatudu ona hodi halo mudansa iha uma ne'e nia laran ?"

Maibe ambisaun ne'ebe maka'as liu ona, namlele iha anin leten, taka ha'u neon, sai haluha an hodi halo finze larona. No karik ha'u rona, ha'u sei hatan, "Aahh... ne'e U bo'ot. Naran katak ha'u eksen lai. Imi di'ak hela to ?" Nune'e, ha'u bele hadau oportunidade ba ema seluk nian, ha'u sei kapasita mesak an hodi lahatutan ba ema seluk, no to'o ikus destinu bolu, ha'u sei mate hamutuk ho ha'u nia matenek hotu neim atu haburas iha ema seluk nia liman.

Refleksaun :

"Wainhira ita sai matenek, hetan fiar, sa'ida mak ita sei transforma hodi hakbi'it ema seluk (iha ita sor-sorin) nebe susar hetan oportunidade atu kapasita sira an ?"

Caicoli, 06.03.17

Djoe Lari Mata